السلام عليكم ورحمة الله ,,
صبااح الخيير
اليوم ولدي طروقي داوم اول يوم بالحضانة المنزلية ,
بعد تفكير طويل وبحث عن حضانة مناسبه وللاسف مالقيت , قررت ادخله حضانة منزلية ,
الحضانة المنزلية , فيه منها المرخصه وباشراف الحكومة , وهذا الشي الوحيد الي حمسني اني افكر بالحضانة المنزلية
بعد كم زيارة , زرت وندي , صينية الشكل لكن الاطباع كلها استرالييه , حبيتها مرة لطيفة وهادية وجميله وانيقه , وفوق كدا بيتها شرح وكبير مررة , وعندها حوش يرد الروح , ومجهزه المكان وكانه حضانة ,,
الاسباب المهمه الي خلتني اقتنع بالحضانة المنزلية:
1- عدد الاطفال لكل مربيه اقل , مثلا في استرليا لكل مربيه منزلية 4 اطفال تحت سن 5 سنوات فقط , اما الحضانة الي بمركز زي المدرسه , 11 طفل لكل مربيه , فالتركيز اكبر على ولدي لما يكون في حضانة منزلية.
2- التواصل افضل مع المربيه لان تركيزها اعلى على الطفل , فاعرف ايش عمل ولدي , ايش عجبه وايش ماعجبه , ايش طريقة التعليم المناسبه له.
3- بما ان عدد الاطفال بالحضانة المنزلية اقل , اذن العدوى وقت المرض اقل بكثييير , الحضانة المفتوحة غالبا فيها عاملات كثيير واطفال اكثر , فانتشار المرض اسرع بكثير.
4- واخيرا والسبب الي يهم جميع المبتعثين , اسعار الحضانة المنزلية الرسمية وان كانت غاليه لكن تبقى افضل بفرق بسيط عن الحضانة المفتوحة .
بعد ماكملنا اجراءات تسجيل ولدي , مع مكتب ادارة الحضانة , اليوم 25 يناير اول يوم ,
الحمدلله ولدي متعود انه يقضي وقت لوحده , وقبل كدا داوم في حضانة , فماكان فيه صعوبة بالموضوع ,
اهم النقاط الي الام لازم تعلمها الطفل اول يوم الحضانة من رايي :
1- لازم الام تفهم الطفل هوا ليش جا الحضانة , وايش راح يعمل .
2- الام تعرف طفلها بباقي الاطفال وتعرف باقي الاطفال على طفلها, خاصه اذا كان الطفل خجول ومايختلط بسرعه .
3- الام لازم تودع الطفل ولازم تاكد له انها ح ترجع تاخدة لما يقضي شوية وقت بالحضانة.
4- اذا كان الطفل جدا متعلق بامه الافضل اول يوم تركه فترة بسيطه جدا وزيادة الوقت مع الايام
5- اذا بكي الطفل , عادي جدا وطبيعي جدا , اهم شي ودعيه ويشوفك وانتي خارجة , مع الايام بيتعود ان البكا مارح ينفع .
بالبداية لما كنت احط ولدي بالحضانة ويبكي , انا ابكي معاه , وحاله , مع الايام ولدي حب الحضانة وتعرف على اطفال , وكان معاه بنت صياحة كل يوم مناااحة من يوم ادخل لين اطلع , بعد اسبوعين ولدي انبسط معاها وصارو اصحاب , ويقوم من النوم متحمس عشان الحضانة ويسبقني ع السيارة. فطبيعي جدا ان قلبي يعورك وتحزني بس , هذا افضل للطفل ان يختلط باطفال بعمرو ويتعلم يكون اجتماعي بدون وجودك الدائم حوله.
.
.
اخر شي , الحضانة الي دخلت ولدي فيها تلزمني ارسل وجباته كامله معاه,
واعطوني ملف فيه اساسيات عمل الوجبات ,
مثلا:
الوجبه لازم تحتوي على : منتجات حليب + منتجات بروتينيه + خضار + فواكة
لازم تكون الكميات مناسبه لعمر الطفل بحيث ان الوجبه كاملة تشبعه , ومانعتمد على صنف واحد
وهنا اول وجبه :
فرزت خضار استخدمه بشكل دايم لسندوتشات ولدي , لان الكمية الي احتاجه له قليل جدا فبدل ما اقطع كل يوم كمية صغيره , حلي المفضل والدائم , التفريز
السناك الصباحي :
تفاح وموز
الغدا:
تورتيلا محشية بيض وخضار ( بصل + فلفل رومي + طماطم + كزبرة )
لبن زبادي
سناك بعد الظهر:
ذرة + بسكوت شوفان وقمح
ولان اهم شي يشربه الطفل بعمر ولدي الموية , بطلنا نشربه عصيرات تماما , وصرنا نعوده على شرب الموية مع وبين الوجبات ,
سجلت على كل علبه وقتها , فالمربيه تعرف متى تعطيه اكله
ولان الوجبه فيها لبن وخضار فضلت تكون بارده عشان ماتخرب , اضفت علبه ثلج (IcePack)
تحفظ الاكل بارد لوقت طويل
ليست هناك تعليقات :
إرسال تعليق